BENEDIC anima mea domino: & omnia que intra me sunt nomini sancto eius. ¶ My saule bliss til lord: and all that is withinen me til the haly name of him. ¶ In this psalme a trew saule spekis til it selfe and amonestis to loue god of all his goednes, that all thoghtis and strenghtis and vertus blis his haly name. wele semys it that mykil swetnes and ioy is in that saule.
2. Benedic anima mea domino: & noli obliuisci omnes retribuciones eius. ¶ My saule bliss til lord: and will noght forgett all his ȝeldyngis. ¶ Aswhasay, delite of syn be noght in thi sight: bot lathsumnes of syn, and forgifnes of god. thynk all thi synnes. for als many as thai ere; als many ere the ȝeldyngis of god. twis he biddis his saule bliss. for he will that oure saule be ay in thoght and louynge of god.
3. Qui propiciatur omnibus iniquitatibus tuis: qui sanat omnes infirmitates tuas. ¶ The whilk hafes mercy of thi wickidnessis: the whilke helis all thi seknessis. ¶ That is, he for|gifes thi syn, and eftire forgifnes he helis thi saule. that it be noght eft takyn [U takynge. S, M taken.] with fleyssly ȝernyngis. bot at the ende he helis all perfytly.
4. Qui redimit de interitu vitam tuam: qui coronat te in misericordia & miseracionibus. ¶ The whilk byes fra ded thi life: the whilke corouns the in mercy and in merciyngis. ¶ With the pryse of his blode he boght the fra hell. and if thou will ouercum thi fas, he corouns the in heuen. that is noght bot of his mercy.
5. Qui replet in bonis desiderium tuum: renouabitur vt aquile iuuentus tua. ¶ The whilke fulfillis in goeds thi ȝern|ynge; newid sall be as of aryn thi ȝouth hede. ¶ Eftire coroun is noght bot fulfillynge of thi desire in endles ioy that thou ȝernyd. and that sall be when thi ȝouthede is newid as of the aryn. The aryn, when he is greuyd with grete elde, his neb waxis swa gretly that he may noght opyn his mouth and take mete. bot than he smytis his neb til the stane, and has away the sloghe. and than he gas til mete. and bycumes ȝonge agayn. swa crist dos away oure elde of syn fra vs, and mortalite, that lettis vs to ete oure brede in heuen, and newis vs in him.
