nos non cognoscet amplius. ¶ Oure takyns we not saghe. and now prophet is noght: and he sall knaw vs namare. ¶ As|whasay. we hafe sene na wondirs that sould gare vs drede, and draghe vs fra oure lust. and now is na prophet. that is, preste or prelate is nane, that dare chasty vs. for thaim selfe ere als synful as we. and swa god sall knaw vs namare. that is, he rekis noght of oure dedis. and he will not deme vs eftire this life. bot the prophet shewis that thai leghe, and says.
11. Vsquequo deus improperabit inimicus: irritat aduer|sarius nomen tuum in finem. ¶ How lange god the enmy sall vpbrayd; the adversary stirs thi name in ende. ¶ When he says how lange, he bitakyns that vengaunce sall cum soyne. the enmy he kalles generally ilke fals man that lufis the warld mare than god. and he vpbraides god of vnrightwisnes when he wenys that god will noght damyn him. for his syn. and he is aduersary til god, stirand his name til vengaunce, in ende. that is, ay til he dye.
12. Vt quid auertis manum tuam et dexteram tuam: de medio sinu tuo in finem. ¶ Whi turnys thou away thi hand, and thi righthand: of the myddis of thi bosum in ende. ¶ That is, whi lenghtis thou the folk that thou toke til the trouth. thurgh hand of grace. and that sould be sett at thi righthand. fra the bosum of charite. aswhasay. whi suffirs thou swa many of bap|tized men to be scatird out in the deuels seruyse. fare fra the bosum of thi luf: sall that be in till ende of the warlde.
13. Deus autem rex noster ante secula: operatus est salutem in medio terre. ¶ Bot god oure kynge bifor warldis; wroght hele in myddis of erth. ¶ ffals cristen men ere turnyd away fra god. bot god oure kynge. says rightwismen. that is bifor all warldes, withouten biginynge. wroght hele of saule in myddis of erth. that is, in meke men, that knawis thaim self erth and poudire. whils the proude slepis in thaire syn, and the fende is thaire ledere.
14. Tu confirmasti in virtute tua mare: contribulasti capita draconum in aquis. ¶ Thou confermyd in thi vertu the see; thou angird the heuedis of dragunys in watirs. ¶ Thou confermyd in hope. & trouth. & charite. the see. that is, tha that ware first vnstabile and bittere in syn. in thi vertu. that is, thurgh gastly strenght that thou gaf til thaim. and swa thou angird heuedis of dragunys. that is, thou slogh heuyd synnes, the whilke swikfull deuels eggis. in watirs. that is, in teris of penaunce.
