The Psalter, or Psalms of David and certain canticles / with a translation and exposition in English by Richard Rolle of Hampole ; ed. from manuscripts by the Rev. H. R. Bramley ... With an introduction and glossary.

[PSALM XCII.]

DOMINUS regnauit decorem indutus est: indutus est dominus fortitudinem & precinxit se. ¶ Lord regnyd cled he is in fayrehede: cled is lord in strenght and he beltid him. ¶ Lord regnyd, that is, he made knawyn that he was kynge. & till whaim him likid he shewid the fayrhed of his mageste. and thaim that ere fayre in charite and stalworth agayns the deuyl he lufis thaim, and haldis in honur and clennes. as his clathynge. and beltis, that is, restreyns in thaim all vicys of bodily syn.

2. Etenim firmauit orbem terre: qui non commoue|bitur. ¶ fforwhi he festid the erth: the whilke sall noght be stird. ¶ That is, he made halykirke stabil, that na temptacioun stire it out of charite.

3. Parata sedes tua deus ex tunc: a seculo tu es. ¶ Graythd is thi setil god; fra than fra the warld thou ert. ¶ Thi setil, that is, a meke saule and pesful, is graythd in vertus til the.

fra than. that is, fra thi cumynge: thof thou be god fra withouten bigynnynge.

4. Eleuauerunt flumina domine: eleuauerunt flumina vocem suam. ¶ fflodys lord liftid: flodys liftid thaire voice. ¶ That is, apostils wetand dry hertis, liftand thaim fra couatys. liftand thaire voice in prechynge of haly lare.

5. Eleuauerunt flumina fluctus suos: a vocibus aquarum multarum. ¶ fflodis liftid thaire stremys: fra the voicys of many watirs. ¶ That is, pryncis of the warld, when apostils prechid, shewid hasty persecucioun at the criynge of mykil folke, that gayn sayd the layre of apostils.

6. Mirabiles elaciones maris: mirabilis in altis domi|nus. ¶ Wondirefull the vpberyngis of the see: wondirful in heghe lord. ¶ That is, wondirful ware the tribulaciouns of the warld agayns halykirke. bot oure lord was wondirful in his heghe ser|uauntis, restreynand thaire malice.

7. Testimonia tua credibilia facta sunt nimis: domum tuam decet sanctitudo domine in longitudinem dierum. ¶ Thi witnessyngis ere made trowabile ful mykil; thi hous lord bicumes halynes. in lenght of dayes. ¶ That is, thi biddyngis ere mykil made at trow, for thou confermyd thaim with thi dede. thi hous, that is, mannys saule, bicumes halynes in thi cumynge to hafe in endles life.