The Psalter, or Psalms of David and certain canticles / with a translation and exposition in English by Richard Rolle of Hampole ; ed. from manuscripts by the Rev. H. R. Bramley ... With an introduction and glossary.

[PSALM VI.]

DOMINE ne in furore tuo arguas me: neque in ira tua corripias me. ¶ Lord in thi wodnes argu me noght; na in thi ire amend me [S chastes me noght.] . ¶ Wodness or ire is a stirynge of mannys will, ex|citand to vengaunce. the whilk stirynge is neuermare in god. bot the wodnes of him standis for gret ire. that is rightwis dome [S. U rightwisdome.] . when he sall be seen til ill men as wrethid [S wrethed. U wrecchid.] & as wode. for men sais of a man that sparis noght, he faris as a woedman. as wha say. Lord in thi dome argu me noght. that is sett noght swilk skilles agayns me that i. be conuycte and worthi dampnacioun. for arguynge is to ouer come a nother with skilles: na in thi wreth amend me or chasti me [S No in thi wrethe chasti me noght.] , bot hele me here. with pyne & penaunce, that i be noght thare nouthere argued ne chastid. If i be made hale here, me thare noght dred ded, ne the hand of the leche brennand or sherand. The seuen psalmes of the whilk this is the first. bygynnys all in sorowand gretynge and bitternes of forthynkynge, & thai end in certaynte of pardoun. And thai ere seuen, that we wit that thurgh the seuen giftis of the haly gast all synne may be doen away, that is wroght in seuen dayes of this lif. And alswa for thare is seuen maners of remyssioun of synn. baptem. almus dede. Martirdome.

turnynge of neghbure til god. forgifynge til [U forgif him. S for gyuynge to hym.] him that synnes in vs. satisfaccioun and gretynge for synn. comunynge of sacrament of the autere.

2. Miserere mei domine quoniam infirmus sum: sana me domine quoniam conturbata sunt omnia ossa mea. ¶ Haf mercy of me lord for i. am seke; hele me lord for druuyd ere all my banes. ¶ Haf mercy of me in this lif. for i am seke of kynde and thurgh synne. swa mykil that i may noght bere thi rightwisnes: hele me lord in saule. for my banes, that is my thoght, and all the strenght of my will, ere druuyd in sorowynge of my synne and in penance. his entent is. that sorow for his synn has reft him the shyrnes of warldis delite and fleschly lust, as druuynge does watere.

3. Et anima mea turbata est valde: sed tu domine vsquequo. ¶ And my saule is druuyd mykil: bot thou lord how lange. ¶ That is at say, Mi saule is mykil turned til penance: forthi how lange dylayes thou to gif grace and to hele me: as wha say, i doe that in me is, forthynkand my synne: doe thou that in the is, heland my saule.

4. Conuertere domine & eripe animam meam: saluum me fac propter miserecordiam tuam. ¶ Turne lord and out take my saule; make me saf for thi mercy. ¶ I fele trauaile in turnynge: forthi thou that may, turne me perfitly til the. fulhard it is to be turnyd enterly til the bryghthed and the pees of godis lyght, fra the myrknes of erthly couaitys; forthi he says. out take my saule, bondyn in synn, and lettid with many enmys in turnynge. Naman that heres this sall thynk to be perfit withouten lange trauaile and gret besynes in saule. noght as some foles does. that wenes thaire fete are thare. whare thaire heued come noght ȝit: for a litill penance that thai ere in.

5. Quoniam non est in morte qui memor sit tui: in inferno autem quis confitebitur tibi. ¶ ffor he is noght in ded that menand is of the; and in hell wha sall shrife til the. ¶ Thus i sorow for my synn, and that aghe me wele. for he is noght in dedly synne that euer has the in his thoght: and he that despises thi worde, he has forgetyn the. and swa he is in ded: in hell. that is in blyndhed of wanhope, wha sall shrife till the; nane. for that hell graues synful men.

6. Laboraui in gemitu meo, lauabo per singulas noctes

lectum meum: lacrimis meis stratum meum rigabo. ¶ I trauaild in my sorow, i sall waysch my bed ilke nyght by nyght: with my teris my beddynge i sall wete. ¶ Sinful ere in ded and in hell, and that i be delyuerd tharof i. trauaild, makand amendis for my synn in sorow of my hert. and .i. sall waysch my bed, that is his consciens. the whilk till some is rest. til some tourment. thare restis clen of hert. thare vnclen ere pyned. than he sais, i sall clens my consciens, passand ilk nyght by nyght, that is bi all synnes, that nane be forgetyn vnpunyst, and with my teris, that is the bitternes of penance, my beddynge, that is the nether party of my saule. that is cald [S clepede: and so frequently.] the sensualite, i sall wete. that is .i. sall make it to bere froit, that bifore was drye fra goed werkes.

7. Turbatus est a furore oculus meus: inueteraui inter omnes inimicos meos. Druuyd is of woednes myn eghe: i. eldyd ymangs all myn enmys. ¶ Myn eghe, that is my skil, druuyd is, for dred, noght all out: of woednes, that is the ire of god on domes day, that i dred gretly. for i eldid ymangs all myn enmys. that is i. dwelled lange in synn, and in felaghschip of ill men, till whaim i assentid: that enmys ere to the saule, thof thai seme frendes til the body: til whaim now he spekis, forsakand thaire felaghschip.

8. Discedite a me omnes qui operamini iniquitatem: quoniam exaudiuit dominus vocem fletus mei. ¶ Departis fra me all that wirkes wickidnes; for lord has hard the voice of my gretynge. ¶ Here he shewis that tha that duellis in thaire synn sall be departid fra all that does penance; the voice of his gretynge he kallis compunccioun of his synne.

9. Exaudiuit dominus deprecacionem meam: dominus oracionem meam suscepit. ¶ Lord has hard my beed; lord my prayere has taken vp. ¶ Eftire mykyll sorrow and penaunce he sais verraly that god has herd him. swa that na synful man fall in dispaire, that will folow his penaunce. god vptoke his prayere as offrand. for god has delite in lastynge of men in goednes. forthi.

10. Erubescant & conturbentur vehementer omnes ini|mici mei: conuertantur & erubescant valde velociter. ¶ Shame and be druuyd gretly all myn enmys: turnyd be thai & shame ful swiftly. ¶ In ensaumpile of me shame thai with thaire dedis, and for drede of dome stired be thai till penaunce: in gret sorow be thai turnyd til god. that thai ga [U om. S go.] noght whidere thai thoght:

and shame thaim ful wightly. this falles til cristes myght, that tornes the synfulest man of the warld als tyt when he will, and makes to shame with his synn that bifore had ioy & louynge tharof. this psalme is songen in the office of dedmen, forthi that for swilk sorow and penaunce trew men has eftyre this lyf that thai gretly couaityd here. and ill men than feles the fire of hell, that thai wild noght here dred, bot dispised it, as nane swilk pyne ware ordaynd for synful men.