EXULTATE iusti in domino: rectos decet collaudacio. ¶ Gladis rightwis in lord; the right bicomes louynge. ¶ Vnright|wis men has thaire gladynge in the warld. bot the rightwis gladis in oure lord, whas ioy is endles: and in him ȝe may not ioy bot louand. for thi says he. the right men bicomes louynge, noght the krokid in couaytys, fore thare*. [U thaire. S thor.] is na faire louynge in a synful mouth. wha sa is right he louys.

2. Confitemini domino in cythara: in psalterio decem cordarum psallite illi. ¶ Shrifis til lord in the harpe: in psautery of ten cordis syngis til hym. ¶ In the harpe thai shrif that louys god whether wele or wa fall on thaim: and syngis til him in psautery of ten cordis, that is, stire ȝou to serue til charite, in the whilke ten comaundmentis is fulfild.

3. Cantate ei canticum nouum: bene psallite ei in vociferacione. ¶ Syngis til him a new sange; wele syngis til him in heghynge of voice. ¶ Syngis til him a new sange, that is, dosaway all synn. and clathis ȝow in new life and clen: and wele syngis til him with goed werkis in heghynge of voice, that is, in a wondirfull ioiynge that heghis ȝoure voice til god. when ȝoure thoght is taken in til the myrth of heuen: as it may be in erth lifand.

4. Quia rectum est verbum domini: & omnia opera eius in fide. ¶ ffor right is the word of lord; and all the werkis of him in trewth. ¶ His word is right, for that he hight is sothfast, and he desaifis naman. and all the werkis of him ere in trouth*. [S treuthe.]. that is, the grund of all that he biddis vs doe is in trouth*. [S trewthe.]: for with|outen that may na man quem god.

5. Diligit miserecordiam & iudicium: miserecordia do|mini Page  115 plena est terra. ¶ He lufis mercy and dome; of the mercy of lord ful is the erth. ¶ He lufis forto doe mercy in this life. & dome in the tother. and that is soth: for of his mercy ful is the erth: for in ilk sted he forgifes synn, and his word is prechid.

6. Verbo domini celi firmati sunt: & spiritu oris eius omnis virtus eorum. ¶ Thorgh the word of lord heuens ere festid; and thorgh the gast of his mouth all the vertu of thaim. ¶ That is, thorgh godis sun ere haly men stabild in luf, and fully leryd: and thurgh the haly gast all thaire vertu is strenghid and made perfit.

7. Congregans sicut in vtre aquas maris: ponens in thesauris abissos. ¶ Gadirand as in*. [S ins. 'a.'] gourde waters of the see; settand in tresours depnes. ¶ That is, god in the hertis closes of wickid men*. [S god closes in the hertis of wicked menne.], as in a vessell of lethire, the bitternes of thaire willes, that thai ouer cum noght haly men, and noy noght bot at godis suffrynge. settand depnes, that is, tha that ere depe in malice, in his tresors: that he make his knyghtis riche of thaim, when he suffirs thaim to tourmente his sereuauntis til thaire coroun.

8. Timeat dominum omnis terra: ab eo autem com|moueantur omnes inhabitantes orbem. ¶ All the erth dred the lord: bot of him be stird all wonand in the warld. ¶ The erth, that is ilk man, dred oure lord, that he leue synn: and all that wonys in the warld, that is, all that standis in haly kirke perfitly, be stirid of him and of nan other. If the deuel or man or neddire or leon rise agayn the; dred god. noght thaim. for all tha ere vn|dire him.

9. Quia ipse dixit, & facta sunt: ipse mandauit, & creata sunt. ¶ ffor he sayd and thai ere mayde; he bade and thai ere shapyn. ¶ He sayd, that is he wild, & thai ere made. that is, thai ere fourmyd of vnfourmyd matere: he bade with his worde, and thai ere shapyn in fourme. of noght. for thai may noght doe bot that he suffirs. A man has will to noy. of him self: bot myght to noy he has noght bot if god gif it him.

10. Dominus dissipat consilia gencium, reprobat autem cogitaciones populorum: & reprobat consilia principum. ¶ Lord skaters the counsails of genge, and he reproues the thoghtis of folke: and he reproues the counsaile of princes. Page  116 ¶ That is, he suffirs noght the counsails of wickidmen take effecte, that ere agayns him and his. and he reproues the thoghtis, ydel and vnnayt, of folke: and he reproues the counsails of princes, that is, of tirauntis of this warld, that couaitis to be lordis of the folke.

11. Consilium autem domini in eternum manet: cogitacio|nes cordis eius in generacione & generacionem. ¶ Bot the counsaile of lord lastis withouten end; the thoghtis of his hert in generacioun & generacioun. ¶ Thaire counsails he dampnes: bot his counsaile, in the whilke he makis nane worthi heuen bot him that is vndirlout til him,*. [U ins. 'and.'] lastis ay. and thoghtis of his wisdome ere noght chawngabil bot endles.

12. Beata gens cuius est dominus deus eius: populus quem elegit in hereditatem sibi. ¶ Blisful genge*. [S is the folke.] of whaim is lord god of thaim; folke whaim he chese in heritage til him. ¶ Na man cume til blisse bot oure lord be his god, that is, federe of his hert, and weld him as his heritage. that he be noght full of thornes and brers of synnes.

13. De celo respexit dominus: vidit omnes filios hominum. ¶ Lord lokid of heuen: he saghe all sunnes of men. ¶ He lokid in comynge of his sune: of heuen, that is, of cristen man: & he saghe with the eghe of mercy all that will be borne in new life.

14. De preparato habitaculo suo: respexit super omnes qui habitant terram. ¶ ffra his graithid wonynge; he lokid on all that wons the erth. ¶ That is, fra the wonynge of mannys kynde, that god graithid til him, he lokid on all, forto be thaire ledere, that wonys the erth, that ere maistirs of thaire fleysse.

15. Qui finxit singillatim corda eorum: qui intelligit omnia opera eorum. ¶ He that made sundirly the hertis of tha; he that vndirstandis all thaire werkis. ¶ He made, that is, he fourmyd with the hand of grace, sundirly thaire hertis: for he gifis til ilke a hert propire gift. som on a manere sum on other: and he vndirstandis all thaire werkis, that is, he wate how ilkan oyses his giftis.

16. Non saluatur rex per multam virtutem: & gigas non saluabitur in multitudine virtutis sue. ¶ Kynge is noght safe thorgh mykel vertu; and geaunt sall noght be safe in multi|tude Page  117 of his vertu. ¶ Kynge, that gouerns his fleysse, slaand vices and couaitis, is noght saf thorgh mykil vertu. if he pride him thar in: and geaunt, that feghtis agayn the deuel, sall noght be safe in his strenght, if him thynke that his vertu suffis til his saluacioun.

17. Fallax equus ad salutem: in habundancia autem virtutis sue non saluabitur. ¶ Desaifabile*. [S ins. 'is.'] hors til hele; bot in aboundaunce of his vertu he sall noght be safe. ¶ That is, proude pouste of warldis ioy desaifes and leghis men of hele, bodily or gastly. for the sittere on that hors sall noght be safe in habundaunce of his vertu: that is, thof he be stalworth and riche and faire.

18. Ecce oculi domini super metuentes eum: & in eis qui sperant super miserecordia eius. ¶ Lo the eghen of lord on dredand him; and in thaim that hopis in his mercy. ¶ See whare is hele: the eghen, that is the luf of god. & the lokynge of his godhed, is on thaim that dredis him, and hopis in his mercy: noght in thaire vertu or meryt.

19. Vt eruat a morte animas eorum: & alat eos in fame. ¶ That he delyuer fra ded the sauls of thaim; & fostire thaim in hungire. ¶ He delyueres of ded, and gifis endles lif, and fostirs thaim with his worde and ioy of his luf. that ere in hungire, euermare desirand rightwisnes & the foed of heuen.

20. Anima nostra sustinet dominum: quoniam adiutor & protector noster est. ¶ Oure saule suffirs the lord; for*. [S ins. 'oure.] helpere and oure hilere he is. ¶ That oure saule be fild in mete that may not passe away it suffirs oure lord. that is, it is suffrand his dis|ciplyne, and it may suffire: for he is oure helpere, owhils we afforce vs til him, and oure hilere, owhils we stand agayn oure enmy.

21. Quia in eo letabitur cor nostrum: & in nomine sancto eius sperauimus. ¶ ffor in him ioy sall oure hert; and in his haly name we hopid. ¶ All ioy that is noght in god is erroure: for thi we ioy in him, and hopis in his haly name, that is, in ihū, to be safe.

22. Fiat miserecordia tua domine super nos: quemad|modum sperauimus in te. ¶ Lord thi mercy be on vs; os we haf hopid in the. ¶ That is, thurgh thi mercy be fulfild in vs that we ioy in the withouten end: as we haf hopid in the, that thou will of thi goednes doe.