5. Ad nichilum deductus est in conspectu eius malig|nus: timentes autem dominum glorificat. ¶ Til noght is led the ill willed in his syght; bot thaim that dredis god he glorifys. ¶ The ill willid, that is the deuel, or an ill man that tourmentis him, or does him wrange, is led til noght in his syght. that is at say, he settis thaim at noght in thaire malice. bot thaim that dredis god he glorifis. that is he haldis thaim gloriouse and worthi to rest in godis hill: this perfeccioun is that the deuel and the warld haf na pouste in vs.