The Psalter, or Psalms of David and certain canticles / with a translation and exposition in English by Richard Rolle of Hampole ; ed. from manuscripts by the Rev. H. R. Bramley ... With an introduction and glossary.

3. Ex ore infancium & lactencium perfecisti laudem propter inimicos tuos: vt destruas inimicum & vltorem. ¶ Of the mouth of noght spekand and sowkand. thou has made louynge, for thi enmys: that thou distroy the enmy and the vengere. ¶ Noght anly thou ert loued of perfit men, bot of the mouthe of barnes that spekis noght ȝit. there ere tha that kan noght speke the wisdom of this warld. and of soukand, the whilke gladly resaifes the lare of haly kyrke thaire modere. thou has made thi louynge perfit: for thin enmys, fals cristen men, to shame and to shend: for thai ere were then hathen men. that thou distroy the enmy. that is he that is wise in his awn eghen & will noght be vnderloute til thi wil. and the vengere. that is he that defendis his synn. and sais that he synnys noght, or that his synn is less than other mennes.