OMNES gentes plaudite manibus: iubilate deo in voce exultacionis. ¶ All genge playes with hend; ioyes till god in voice of gladnes. ¶ The prophet, in voice of apostils. amonest|and vs till louynge says. ȝe all genge til whaim grace is comen. makis ȝow play in goed werkis. ioyes til god, that ȝoure hand and ȝour tonge acorde. the hand wirkand. the tonge louand.
2. Quoniam excelsus dominus, terribilis: rex magnus super omnem terram. ¶ ffor heghe lord, agheful: kynge gret abouen all the erth. ¶ This is cheson to ioy, for oure lord is heghe. that is, myghty in all that he will. aghful in his dome, and gret kynge abouen all creatures.
3. Subiecit populos nobis: & gentes sub pedibus nostris. ¶ He made folke suget til vs: and genge vndire oure fete. ¶ That is, he made ill stiryngis and vayn thoghtis to be vndire|loute, that thai ouercum vs noght. and vices ill werkis and fleyssely affeccion he sett vndire the fete of charite, swa that we trede thaim down. if we be thus heghe in erth we sall be ful heghe in heuen. this principate has nane bot haly men.
4. Elegit nobis hereditatem suam: speciem iacob quem dilexit. ¶ He chese til vs his heritage: the fairhed of iacob whaim he lufid. ¶ That is, withouten oure meryt he chese to gif til vs his lufers his heritage, that is, endles life. whilke heritage. the fairhed of iacob. for the heritage of heuen is the fairhed of cristen men, whare thai sall be shynand as the sun. that now semes outkastynge.
5. Ascendit deus in iubilo: & dominus in voce tube. ¶ God steghe in ioy; and lord in voice of trumpe. ¶ Ihū crist steghe in til heuen in wondirful ioy of apostils, that saghe him that tyme. and in voice of trumpe, that is, in voice of aungels, the whilke apperid than and spake. Viri galilei, &c. that was for this skil, that all the warld sould stabely trow that apostils and aungels confermyd. for thi,
6. Psallite deo nostro, psallite: psallite regi nostro, psallite. ¶ Syngis til oure god, synges; syngis til oure kynge, syngis. ¶ Syngis til oure god with goed werkis. syngis in ioy of hert til oure kynge ihū crist: syngis assiduelly, louand him in thoght and in dede. fulhalsum it is that thus ofte is rehercid: forthi syngis.
