and .i. sall say psalme til lorde: that is .i. sall shew goed dede til his honur.
12. Exaudi domine vocem meam qua clamaui ad te: miserere mei & exaudi me. ¶ Here lord my voice with the whilke .i. criyd till the; hafe mercy of me and here me. ¶ Here the voice of my desire, with the whilke .i. criyd till the stalworthly, for to hafe the: and hafe mercy of me, that thi mercy be with my meryt: and here me that .i. haf ane that .i. couaite. the mare [U om. S more.] that a man has the brennandere [S brennondlier.] he askis.
13. Tibi dixit cor meum, exquisiuit te facies mea: faciem tuam domine requiram. ¶ Till the sayd my hert, the my face soght; thi face lord .i. sall seke. ¶ The ȝernynge of my hert that spekis til god, and he anly heris. sayd til the, my face, that is, my presens soght the and nane other thynge. and fra now .i. sall seke thi face lastandly til my ded. and that .i. fynd my sekynge.
14. Ne auertas faciem tuam a me: ne declines in ira a seruo tuo. ¶ Turn noght away thi face fra me; held noght in wreth fra thi seruaunte. ¶ Turn noght away fra me: for it is noght in my myght to wyn that .i. aske, bot in thi goednes: and held noght fra me in wreth in the tother warld. that is, suffire me noght forto fall swa that thou punyes me in hell.
15. Adiutor meus esto domine: ne derelinquas me, neque despicias me, deus salutaris meus. ¶ My helpere lord be thou; forsake me noght, na dispise me, god my hele. ¶ I am sett in the way: bot .i. suffis noght to fynd that .i. seke withouten thi help. withouten the .i. faile: for thi forsake me noght, bot end as thou has bygunen: and despise me noght. thof .i. dedly aske endles ioy. for thou ert god my hele. that salues the wounde of my syn.
16. Quoniam pater meus & mater mea dereliquerunt me: dominus autem assumpsit me. ¶ ffor my fadere and my modire has forsakyn me; bot lord has taken me. ¶ My fadire the deuel, that was my fadire in syn, and my modire the cite of the warld, of whaim .i. was born til the fend. has forsaken me, sekand the and despisand thaim, for thai may noght gif me that .i. seke. bot oure lord toke me, that may gif me all that .i. will: and he takis me to norysch and to rewle, as fadire and modire.
17. Legem pone michi domine in via tua: & dirige me in
