Iohn Barnette bischop of Ely, and maister William Lynne bischoppe of Worcestre diede in this yere; whom maister Alexander Nevyle did succede at Yorke, Thomas Arundell at Ely, and Sir Henricus Wakefelde at Worcestre. A decrete was made in the parliament in this yere that cathedrall churches scholde enjoye their eleccions, and that the kynge scholde not wryte ageyn men electe, but helpe theym to theire confermacion, but this statute profite not. Oon dyme was grawntede to the kynge by the clergy in this yere and parlia|ment, and a xvtc of lay men. Alle Gascoigne rebellede ageyne the kynge of Ynglonde in this tyme, Burdews and Baio ex|cepte, and turnede to the kynge of Fraunce. William With|lesey archebischop of Cawnterbery diede in this yere, the vthe day of Iunius, wherefore the monkes of the seide place askede the cardinalle of Ynglonde into archebischop. The kynge [folio 398a] movede in grete wrathe þerfore, was in purpose to have putte the seide monkes into exile; neverthelesse thei spende grete goodes or that thei cowthe obteyne the favor of the kynge. And the kynge wolde not consente in eny wise to theire desire, neiþer the pope neither the cardinalls. Abowte þe monethe of Auguste a tretys was made at Brugges of certeyne articles towchynge the kynge of Ynglonde and the pope, whiche en|trety endurede by allemoste ij. yere. But at the laste acorde was made that the pope scholde not use from that tyme reserva|cion of benefices in Ynglonde. The noble men of Ynglonde and of Fraunce mette in this yere at Brugges, abowte the Puri|ficacion of oure Lady, to trete for pease betwene the seide realmes; whiche trety endurede by ij. yere to grete charges of bothe realmes, and departede withowte eny effecte. The seete of Cawnterbery vacant unto this tyme, maister Symon Sudde|bury, bischop of London, succedid in that seete of Cawnterbery; maister William Cowrteney bischop of Herford succedid in the church of London, and the bischop of Bangor unto the seete of Herforde. Truse were taken from the feste of Iohn Baptist unto that day twelvemoneþe betwene the realmes of Ynglonde and of Fraunce. Abowte the begynnynge of the monethe of April the duke of Briteyne, with mony erles, barons, and mony oþer noble men, saylede into Briteyn, where thei hade doen mony grete victorys, but that truse was taken oversoone. Grete hete and pestilence was in Ynglond in this yere, and in mony oþer partes of the worlde, by whom peple as with owte nowmbre pereschede and was extincte. Robert Wyfeld bischop of Salisbery diede in this yere, whom Rawfe Argum, doctor in civile, succedid; and Edward lorde De|spenser diede in this yere, and was beryede at Theokesbery, in the churche of monkes. The pope grawntede, at the instance of the cardinalle off Ynglonde, to alle men and women in Ynglonde truly contrite and confessed by vj. monethes in that