Polychronicon Ranulphi Higden maonachi Cestrensis; together with the English translations of John Trevisa and of an unknown writer of the fifteenth century.
Higden, Ranulf, d. 1364., Trevisa, John, tr. d. 1402., Caxton, William, ca. 1422-1491., Malverne, John, d 1415?, Babington, Churchill, ed. 1821-1889,, Lumby, J. Rawson ed. (Joseph Rawson), 1831-1895.

Capitulum decimum tertium.

ROBERT erle of Schrobbesbery, sonne of Roger Mownt Gomerike, made insurreccion in this yere ageyne kynge Hen|ricus, storynge the castells of Schrobbesbery, of Bruggys, of Arundell, and of Tikhull, drawynge to hym mony men of Wales. But the kynge toke alle those castells with yn xlti daies, thro ȝiftes and promisses to men of Wales, and com|pellede the seide erle to abiure Ynglonde; whiche saylynge into Normandy, drawede to William whiche was erle of Morton in Normandy, and also the erle of Cornewayle, whiche trowblede Page  431, vol.7 soore the cuntre of Normandy. Kynge Henry herynge that, and takynge an hoste with hym, wente to Normandy and ȝafe batelle to theyme; and so he obteynynge the victory, putte the erles in perpetuall prison. After that kynge Henricus, levynge Normandy, returnede to Ynglonde, where he made scharpe lawes ageyne theves and oþer trespassours, that is to say, the losynge of theire eien and of theire stones. After that he subduede to hym men of Wales, Scottes, and also the Britons Page  433, vol.7 that were behynde see. Hewe erle of Chestreschire diede in this yere, whom Richarde his sonne, a childe havynge vij. yere in age, did succede. Venerable Anselme, kepynge a cowne|sayle at London, deposed mony abbottes, and putte þeire places to ferme; cursynge every Sonneday alle men usynge the synne Sodomye, whiche sentence he retracte soone; for the publica|cion of that vice inducede peple that hade not knowlege of that synne afore to use hit. Also he prohibite prestes to have wyfes or concubynes. A grete discorde was spronge betwene the kynge and Anselme, in that he wolde not consecrate pre|lates whiche hade taken investitures of seculer men, for this cause specially, in that the pope hade prohibite but late afore that thynge on his curse. Neverthelesse Giraldus the arche|bischop of Yorke consecrate suche men when that Anselme was goen to the pope. The peple of Flaundres come into Ynglonde in this tyme, for the desolacion of a cuntre to in|habite, [folio 351a] Page  435, vol.7 in þat the cuntre of Flandres was oppressede with gravelle of the see. To whom kynge Henricus ȝafe licence to inhabite a cuntre nye to þe water of Twede; whiche peple wente after into Weste Wales in the xiij. yere of the reigne of this kynge. The body of seynte Cuthebert was founde incor|rupte in the iiijc yere after his sepulture, with the hedde of seynte Oswalde, for the incredulite of diverse prelates. iiij. whyte cercles apperede abowte the sonne in the vijthe idus of Iunius; and on Scherethursday nexte folowynge ij. moones were seen afore day, oon in the este, an other in the weste. In whiche yere a grete discorde was movede betwene Henricus themperoure and Henricus his son, insomoche þat the sonne imprisonede the fader. In whiche yere also seynte Anselme was accorde with the kynge commyn to Bectum, and sende after þat to Ynglonde.