callede the kynge of churles, whiche reconsilede afterwarde, was sleyne by treason. But Canutus the kynge, dredynge to sle Edmund and Edwarde, sonnes to Edmund Irenside, for schame, sende theyme to be sleyne of the kynge of Suaves. That kynge dredynge God, sende theyme to the kynge of Hungary, Salomon by name, that thei scholde have theire lyfe. And Edmund maryede the doȝhter of that kynge, whiche diede soone after withowte eny childer. Edward, that other broþer, mariede Agatha, doȝhter of Henre the emperoure, of whom he gate a doȝhter, Margarete by name, after qwene of Scottes, and Christian, a myncheon, and Edgarus Adelynge. Henricus, libro sexto. This worde Adelynge is compownde after the langage of Saxons, of Adel, that is noble, and of this worde lyng, that is an ymage, as a noble ymage. Wherefore the Westesaxons have in grete despite that person, whom they calle Hindirlynge, sowndynge as deiecte from honeste. Hooly kynge Edwarde intended to have made this Edgar Adelyng his successour of the realme of Ynglond, neverthelesse he, dredynge the sonnes of Godewyn and the wickydnesse of the peple, made William of Normandy his successour. Willelmus de Regibus, libro secundo. This Canutus, thenkynge to be sure of the realme, mariede Emma the qwene unto hym, of