Page 233, vol.7
![Scan of Page 233, vol.7](/cgi/t/text/api/image/cme:AHB1341.0001.001:00003888/full/!250,250/0/default.jpg)
Capitulum vicesimum nonum.
THIS Harolde reioycynge the realme of Ynglonde, thouȝhte hym as free of that promyse made to William duke of Nor|mandy, in that the doȝhter of William, whom he scholde have mariede, diede with ynne yeres of mariage, and in that William duke of Normandy hade grete werre and batelles of cuntres nye to hym. Neverthelesse this duke sende to hym writeng pleasaunte in parte, and manassynge also, for the promyse broken that he made to hym. But Harolde sende to hym writynge ageyne, seyenge a presumptuous promisse not to be observede, and specially to hym of a strange realme with owte a generalle decrete of the londe; and also an othe or promyse made by foly to be broken, and specially coacte by necessite of tyme. Wherefore the seide duke instorethe a batelle, desirenge the favor of pope Alexander, whiche pope sende to hym licence to execute his purpose, with a baner also. ℞. The causes folowynge causede the seide duke to ȝiffe batelle ageyne Harolde.