Page 131, vol.7
![Scan of Page 131, vol.7](/cgi/t/text/api/image/cme:AHB1341.0001.001:00003837/full/!250,250/0/default.jpg)
Capitulum vicesimum.
IOHN þe xxti succedid Benedicte the pope ix. yere. In whiche yere Marianus the Scotte was borne, thro the labor of whom this presente cronicle was encreasede moche. Marianus. Men of Norway repellynge seynte Olavus theire kynge for his grete mekenesse, toke Canutus to theire kynge, whiche was sleyne wikkidly in the iiijthe yere folowynge. Roberte kynge of Fraunce diede in this tyme, whom Hewe his sonne did succede; in whiche yere also Canutus, levynge Denmarke, [folio 322a] wente to Rome, ȝiffenge regalle ȝiftes to seynte Petyr, and delyverede the scole of Saxons þer from every tribute. Also he ȝafe large almes in returnynge towarde Ynglonde, and redemede the passage of pilgremes in mony places with grete goodes, and releschede to the pope that the primates of Ynglonde were wonte to ȝiffe to hym for the palle, sendynge letters to the gentilmen of Ynglonde that they scholde correcte alle thynges to be correcte afore his commynge. Benedicte the ixthe succedid pope Iohn viij. yere; this pope was eiecte, and an oþer callede Silvestre subrogate; but that pope Silves|tre eiecte, Benedict þe pope was restorede. This Benedict made