in the tymes of kynge Ethelrede by Suanus kynge of the Danes. The firste tribute was of xxiiijte ml
li. of silvyr; the secunde tribute was of xxxvjte mlli. of silvyr; the thrydde tribute was of xlviijte mlli. of silvyr; the iiijte tribute was of lxxij. mlli. of silvyr, whiche endurede by xvj. yere. This kynge hade to his secrete cownesayle specially an erle, Edricus by name, whiche was lorde of Schropschire, Herdfordeschire, and Worcestreschire, after whom alle thynge was rulede, and with|owte whom noo thynge was done. This Edricus hade a [folio 313a] brother, schireffe of Kente, whiche oppressynge moche men of Kente, was sleyne by theyme in the cite of Cawnterbery; wherefore Edricus, for vengeaunce þerof, willede to have destroyede the cite, but the kynge wolde not condescende and suffre hym to do so. This Edricus was a fals man, schewynge a pleasaunte contenaunce to the kynge, and intendynge the destruccion of the realme, schewynge to the Danes, whiche wasted and destroyede the cuntre, the secrete cownesaile of the kynge, and movede theyme to sege Cawnterbury, in that he hatede þat cite moste specially. The Danes toke the cite of Cawnterbury, destroyenge hit, sleynge and oppressenge the peple in hit; takynge with theyme blissede Elphegus the archebischop, and ledynge hym to Grenewich putte hym to dethe. The kynge, as clothede with misery and langoure, diede at London, and was beriede at the churche of Seynte Paule in the same cite. Blissede Dunstan diede, the vertuous lyfe of whom Osdernus monke of Cawnterbery did write. Amonge other miracles, he rehersethe that seynte Dunstan, preyede by a noble religious woman to make noble a scole for a preste with the ymages of Petyr and Paule and of apostoles and martirs, an harpe putte nye a walle was herde to repre|sente, as to sownde and to herynge, the tune of this antemme,