heremite, dwellynge in deserte, in the hye weye towarde Ynde from Araby or Caldee, whom he visitte ofte tymes, in so moche that his men were vexede soore þerwith, for the necessite of theire maistere causede theyme to wake mony nyȝhtes with|owte eny slepe. Whiche thouȝhte to slee the heremite: at þe laste hit happede this Machometus to be made drunke þer in a season, whiche beynge faste in slepe, his men conspirede, come to his chambre, and takenge his swerde did sle the heremite, [folio 268a] and putte after that his swerde alle bloody in his shethe. Machomete arysynge in the morowe, and fyndynge the heremite sleyne, was hevy in herte, and thouȝhte how he myȝhte be vengede of his men. But the men acordede afore, seide that he hade sleyne hym in his drunkenesse, schewynge to hym his swerde defilede with bloode. Machometus supposynge that to be tru, cursede wyne and alle men drynkynge hit; where|fore devoute Saracenys in the lawe drynke noo wyne, but that man is worthy to be reprovede þat drynkethe wyne amonge theim; nevertheless thei have delectable drynke made of diverse spices, but somme of þeym drynke wyne secretely. That pesti|lente secte encreasede so moche after the dethe of Machomete, that hit toke men of Persida into dedicacion, and to the super|sticion of men of Araby, infectynge after that alle Affrike and a grete parte of Speyne, contynuynge soe unto this tyme pre|sente. And Turpinus tharchebischop rehersethe, Machomete made an ydole of auricalke or alkmuyne in the brynke of the see of Speyne, made with his awne hondes, havynge the face of hit towarde the meridien, in whom he includede a legion of spirittes by nigromancy, and a Cristen man comynge to þat