And after Wibba Ceorlus his cosyn x. yere. After whom Penda, the sonne of Wibba, reignede xxx. yere; whiche did slee ii. kynges of Northumbrelonde, Edwinus and Oswaldus, and iii. kynges of the Ynglische men, Segebertus, Egricus, and Anna. To whom his qwene Kyneswida brouȝte furthe v. sonnes, Weda, Wulferus, Etheldredus, Morwaldus, Mercellinus, and ij. doȝhters, Seynte Kyneburga and Seynte Kyneswida. Beda, libro 11o, capitulo nono. A man with a knyfe putte secretely in a staffe, Eumerus by name, sende from Quichelinus, kynge of West Saxons, to sle kynge Edwynus, comme in this yere to the kynge's cite, nye to the water of Dorwen. But oon Lilla, a specialle minister and tru to his kynge, perceyvynge that, and havynge noo thynge to defende hym, receyvede the stroke of that wickede man, puttenge his body as a schelde afore the kynge. Whiche servaunte persede thro, the kynge was hurte soore with the same stroke; that wickede man com|passede with other men of the kynge, pereschede an other knyȝhte with his knyfe. In whiche nyȝht of Ester the qwene