when thei began, and how longe thei haue indurede, y schalle towche in parte. Alfridus. The firste realme was of men of Cawnturbery, protendede from the sowthe occean vn to the floode of Thamys, in whom Hengiste roignede firste in the yere of oure Lorde God, after Dionysius, cccc. lv. yere, and that realme durede by ccc. lxviij. yere vnder xv. lytelle kynges, vntil, Baldredus [Haldredus, Harl. MS.] expulsede, Egbertus kynge of Westesaxones added that realme to his impire. The secunde realme was of Sowthesex, hauenge on the este to hit Kente, of the sowthe the see and the yle of Wiȝhte, at the weste Hampteschire, at the northe Southerey, in whom Elle with his thre childer began to reigne firste in the xxxti yere from the commenge of Englische men, whiche realme wente soone after in to other realmes. The thrydde realme was of Estesex, hauenge on the este to hit the see of Fraunce, on the weste the cite of London, on the sowthe Thamys, on the northe to hit, Southefolke. The [folio 69b] kynges of whiche place from the firste Seberte vn to the tyme of Danes, by x. kynges, were obediente to other kynges, moste specially to the kynges of þe Marches, vn til that Egberte, kynge of Westesaxones, subduede hit to his impyre.