Polychronicon Ranulphi Higden maonachi Cestrensis; together with the English translations of John Trevisa and of an unknown writer of the fifteenth century.
Higden, Ranulf, d. 1364., Trevisa, John, tr. d. 1402., Caxton, William, ca. 1422-1491., Malverne, John, d 1415?, Babington, Churchill, ed. 1821-1889,, Lumby, J. Rawson ed. (Joseph Rawson), 1831-1895.
Page  199, vol.1

Capitulum vicesimum tertium.

HYT is redde in storyes that Ytaly somme tyme occupyede of the Grekes, was callede the grete londe off Grece. Also hit was callede Hespera, after a sterre callede Hespera, whiche directe the Grekes saylenge to hit. After that hit was namede Saturnia of Saturnus inhabitenge hit, afterwarde callede Latium, for the drede of Iouis his son lyenge there priuely; whiche was callede afterwarde Ausonia, of Ausonius son of Vlixes. Afterwarde hit was namede Ytaly of Ytalus kynge of Siculynes, the moste nowble prouince of alle Europe, whiche is schutte on the northe parte to hit with the see Adriatike, on the este with the grete see, of the sowthe with Sicille and with the see Tyrene. From whom iij. nowble and famose floodes of Europe take theire originalle, whiche be callede Renus, Danubius, and Rodanus. Plinius, libro secundo, capitulo centesimo sexto. In this prouince is Page  201, vol.1 the welle of Cithonis healenge the woundes of eien. Isidorus libro tertio decimo. Also there is a welle callede Novacius nye to the hilles of Alpes, whiche floethe ouer with watere abowte the solstice of somer, and is drye in wynter. Paulus, libro secundo. There be mony prouinces of this Ytaly, whiche be Calabria, Apulia, Campaniia, Beneuentana, Tuscia, Emilia, Liguria, Lombardia. Apulia is a coste of the see of Ytaly, sette at the sowthe of hit, departede from Sicille by an arme of the see, byldede and edifiede firste by Grekes. The chiefe cite of whom is callede Brundusium, takenge the name of hit of this worde brunda in Grewe, þat is the hede of an herte, in that hit holdethe in the figuracion of hit the similitude of the hede of an herte. Campania is a moore region betwene the territory of Rome and Apulia. The chiefe cite of whom is callede Capua, namede so of the capacite of sufficiaunce, callede the thrydde Page  203, vol.1 nowble cite to Rome and to Carthago. In whiche londe be cites callede Neapolis and Puteoli, where the bathes of Virgille were hade somme tyme in worschippe. There is also an oþer Campania more litel, the chiefe cite of whom is callede Cretas or the cite Cretense.*. [The similarity of c and t in MSS. has misled the translator, who probably had no notion where the place was.] ℞. That cuntre of Ytaly hathe be possessede of diuerse peple and naciones, as of Grekes, of Iano, [of] Saturno, of Ytalo, and of Enea. After that of Frenche men Senonense vnder Duke Brennus. Also hit was occupiede of Gothis, Hunes, and Wandalynges abowte the yere of our Lorde cccc. and laste occupyede off Longobardes, abowte the year of oure Lorde vclxviij., in the tyme of Iustinian prynce, of the name of whom the forther parte of Ytaly from Alpes alle moste to the cite of Rome is named ȝitte Lumbardy. Of the begynnenge of Longobardes, and of the progresse of theym, Paulus Diacon of Rome rehersethe in his firste boke of the story of Page  205, vol.1 Longobardes, in this maner, Winuli or Longobardes takenge that name of the longe berdes whom thei noryschede, wente furthe from the northe partes of Allemeyne under Ibor and Aione the gouernoures of theyme, with prudente Gambara moder to theyme, from Scandinauia.*. [Scandimauia, Harl. MS. twice.] This Scandinauia*. [Scandimauia, Harl. MS. twice.] is callede an yle not in that hit is in the see, but for cause that is compassede abowte with waters in the pleynes of the brynkes of hit. Winuli goenge furthe entrede a region [folio 37b] namede Scoringa, where the Wandalynges were devicte. Ibor and Aione, the dukes and gouernoures of theym dedde, they made Agelmundus kynge, son of Aio, xxxiij. yere hauenge his gouernaile and reigne ouer theyme. In the tyme of whom a woman hade vij. childer at oon childenge. After whom Lethen reignede xlti yere, after hym Hildegog. After whom Gloffo, after hym Cato. After whom, Waco Page  207, vol.1 destroyede, Walcarius his son reignede on the Longobardes vij. yere. After whom Audoenus reignede, whiche ledde the Longobardes firste in to Pannony.*. [Ytaly Pannony, MS., but Ytaly erased.] After whom Albinus his son reignede, whiche desirede Narses Patricius to inhabite Ytaly, in the tyme of Iustinus themperoure, the yere of oure Lorde vcxlviijthe, after that Longobardes hade taryede in Pannony by xlijti yere. Of the conqueste of Albinus, and of his meruellous goenge furthe, hit schalle be expressede abowte the yere of grace vc and lxxti.