or bodili bering ther of is a ful greet and a bisi re|membrauncing to hem, that thei ouȝten forbere and ouȝten caste awey ouer greet loue therto; and also of this forbering the touche and the bodili bering aboute cometh noon yuel. Wherfore it is allowe|able, ȝhe, and preiseable this, that thei forberen [for beren, MS. (without hyphen).] for euer for to touche eny money or forto bere aboute hem eny money, if thei so forberen that therbi thei wolden be remembrid thus as is bifore now seid, and as now in forme schal folewe: "Lo we han take up on us forto forbere greet loue to money, and in token and in signifiyng therof we han bound us silf for to neuere touche neither bere money; lete us therfore (as thus remembrid) make oure deede accorde with oure bond, that we trespace not aȝens oure bond."
Perauenture aȝens the iustifiyng now mad for the iije. gouernaunce summe men wolen obiecte and chalenge thus: If freris of Frauncessis religioun for|bering handling and bering of money, for that this handeling and bering ben neiȝingis and homeli en|termetingis with money, and for that thilk forbering schal make in hem a remembraunce that thei ouȝten not loue money ouer myche; whi forberen not thei telling of money with a stikkis eende, sithen this telling is a nyȝ and a ful homely entermeting with the same money, and the forbering of such telling myȝte make in hem lijk remembrance as the forber|ing of handling schulde make? Also sithen iewelis of gold and of silver and of preciose stoonys and knyfis and girdelis harneisid with gold and siluer and suche othere araies ouȝten not be loued of hem ouer myche, whi forberen not thei to touche in handling and the bering upon hem of suche now seid iewelis and knyfis harneisid with siluer and gold?
