reyne daies aftir mydday, for to counceile with her freendis and with her wise counseilers aboute making of accordis and aboute redressing of wrongis and aboute othere vertuose deedis. And so open it is, that thouȝ no mo godis schulden come therbi than these iij. now laste rehercid; certis tho ben sufficient forto proue the seid wijde and large chirchis to be alloweable and profitable, if thei be mad into these now rehercid gode effectis. And thus miche is ynow for [forto, MS. (first hand).] iustifiyng of the ije. gouernaunce spokun in the next bifore going chapiter of this ve. partie.
And thouȝ summe men wolden seie that yuel cometh bi occasioun of suche seid lordli bildingis oc|cupied with inne the gatis of religiose monasteries, certis therto mai treuli be seid that not eny yuel, which mai not eesili be remedied, stonding al the good which bifore is rehercid to come bi the same bildingis and her occupiyngis; and not gretter yuel, than is the yuel which is excludid and lettid bi oc|casioun of the seid bildingis and of her occupiyngis; and therfore this obieccioun hath no strengthe.
xiiij. CHAPITER.
THE iustifiyng of the iije. gouernaunce spokun bi|fore in the [xije.] [A space is left for the number.] chapiter of this present ve. partie schal be in ij. causis, of whiche the firste is this: Whanne euer eny deede or thing is to be forborn or left, [lest, MS.] for that it is yuel, or for that it is perilose, or for eny other good cause, it is alloweable, ȝhe, and preise|able forto forbere the neiȝing and the entermeting and the homelynes with the same thing; as whanne euere and where euer fleischli loue to a womman is
