dyuyne officis of euensong and matins and masse and prechingis, and mowen bi ofte seing of religiose gouernauncis and obseruauncis be moued the more into contricioun, compunccioun, and deuocioun. And sithen these noble and notable and riȝt profitable effectis of perfiting lordis and ladies mowen not be so weel had and gete to lordis and ladies, if thei schulden dwelle in citees out of mansiouns bildid with inne religiose gatis, as if thei schulden dwelle in mansiouns bildid with inne religiosis gatis; it folewith nedis, that for this cause of the more per|fiting lordis and ladies it is alloweable, resonable, and profitable hem to haue mansiouns couenable for hem within the monasteries of religiose persoones, of what euer religioun tho religiose persoones ben.
The ije. cause into the iustifiyng of the ije. gouer|naunce is this: It is alloweable, resonable, and pro|fitable that religiose persoones, of what euer religioun thei ben, haue freendis and menteyners and defenders; namelich to haue lordis and ladies into her main|teyners and defenders aȝens wrongers and diffamers of the synful and wickid world, for that lordis and ladies ben myȝtier forto so menteyne and defende than othere louȝer persoones ben. But so it is, that bi this that lordis and ladies dwellen withinne the monasteries of religiose persoones, tho lordis and ladies wolen and musten needis bi kindenes and bi resoun be moued forto be bi so myche the more and the better menteyners [and] defenderis to the same religiose persoones and to the freendis of the same religiose persoones. Wherfore for this ije. cause of frendschip geting and holding to religiose persoones, it is resonable, alloweable, and profitable, if man|siouns for lordis and ladies be bildid withinne the cloosis and gatis of religiose monasteries, of what euer religioun tho monasteries be, but if the reule of thilk religioun it weerne; which excepcioun y vndirstonde
