synneth not as in that and therfore, but he ther yn deserueth thank and meede of God. Forwhi in en|saumpling of a gouernaunce being Goddis lawe no|man synneth as in that and for that, but he ther yn plesith God and deserueth thank and meede. And so it is, that the seid vje. principal gouernaunce is Goddis lawe, as the next bifore going principal con|clusioun weel schewith and proueth. Wherfore in ensaumpling bi deede the seid vje. principal gouer|naunce to othere men, noman synneth as in that and for that, if othere causis of synnyng ben awey; but he ther yn deserueth weel.
xij. CHAPITER.
FERTHERMORE it is to wite, that summe of the lay peple not oonli holden aȝens the substaunce of the seid religiouns now had and vsid in the chirche; but also thei holden aȝens the habitis, whiche bi tho religiouns ben assigned to be worn of the religiose persoones. And thei seien that no good skile is, whi tho religiose persoones schulden were so straunge and dyuerse formes of habitis fro her othere Cristen britheren.
Also summe of the lay partie blamen and holden aȝens this, that religiose monasteries (namelich of the begging religiouns) han withinne her gatis and cloocis grete, large, wijde, hiȝe, and stateli mansiouns for lordis and ladies ther yn to reste, abide, and dwelle; and this, that thei han large and wijde chirchis like sumwhat to cathedral or modir chirchis of diocisis.
Also summe of the lay peple blamen and scornen and holden aȝens this, that bi the religioun of Seint Fraunces the religiose persoones of thilk religion schulen not handle and touche with her hond neither bere aboute hem eny money, that is to seye, eny
