stronge and longe and wordful disputing and pleding and so bisy sewt (what bi preiyng, and what bi thretenyng, and meedis ȝeuyng, and biheting) that ful manye vniust goingis out schulden be maad and doon, and so manye grete synnes of iust vowis breking schulden be doon, and miche troubelose worldli vn|restfulnes schulde be brouȝte ynto the hertis of tho religiose persoones ful vnaccording and contrariose to her religiose vertuose lyuyng, as to ech mannys resoun which hath experience of this worldis cumberaunce this is ful sureli knowun. And therfore Godis forbode that in mater of so greet and so holi a purpos, as suche religiouns now bifore ben proued to be, eny persoon schulde be licencid fro his cloister, or fro his habit vndir such as now is pretendid colour without sufficient proof of the same colour had at the vttrist, as ful seeld it is suche caasis to falle.
And aȝenward, if such proof be had, Goddis forbode be it, but that such a persoon be licencid to go; for the entent of the fundacioun of thilk religioun is not theraȝens but therwith, as is now bifore seid; for as miche as al what euer is founde and foundid and maad bi man ouȝte obeie to it what is founde and foundid bi God him silf, and that is doom of riȝt resoun and vce of hise sacramentis. And in this maner and for such pretendid and weel proued causis religiose persoones ben licencid forto leue perpetuali her pro|fessid religiouns; as that nunnys han be takun out of her cloistris, and han be weddid to princis; and monkis han be take out of her cloistris, and han be weddid and mad kingis; [and mad kingis is interlineated in a later hand.] namelich whanne therupon hangith ceesing of greet werre and making of greet pees or othere causis like grete weel and surely proued to be trewe; and claustral monkis han be
