The repressor of over much blaming of the clergy.

AND thus herbi it is open, that noon of the reli|giouns now vsid among Cristen men with the comoun hool lawe of Cristente eny man mai reproue or blame to be as for this, that thei ben religiouns founde bi men and sett to the hool religiose lawe which Crist assigned to Cristen men. Wherfore if eny men wolen be aboute forto reproue and blame eny of these now seid and vsid religions to be, certis he muste take to him other cause and ground than this, that thei ben religiouns founden bi men and sett bi men to the seid hool lawe of Crist. And therfore he muste take to him this cause and ground, that summe statutis and ordinauncis of these religiouns ben aȝens the seid hool lawe of Crist; and sithen thilk lawe of Crist is not maad but of lawe of kinde and of Cristis sacramentis, he muste pretende and take for cause of his reprouyng and blaming that summe of these seid statutis and ordinauncis ben aȝens lawe of kinde or aȝens the lawe of Cristis sacramentis; and ellis he maie neuere in eny thing worth be aboute to reproue and blame eny of these seid religions to be. And certis forto proue and menteyne this pretencioun is ouer hard to eny man on lyue. Forwhi the iij. principal vowis, whiche ben oon and the same in ech religioun now vsid in the chirche, ben not aȝens the comaundementis of lawe of kinde neither aȝens the ordinaunce of Cristis sacramentis. And of ech other statute or obseruaunce kept and vsid in eny of the seid religiouns it is so, that noon of hem is mad to be takun into vse saue with this vndirstonding and condicioun, if and as he accordith with the comaunde|mentis of lawe of kinde and of Cristis sacramentis. And therfore if it can be schewid and proued sureli