tho thingis and do and ordeyne tho deedis, schulden be as in parti idil, vnoccupied, and vein. And aȝen|ward tho thingis and deedis, whiche men hem silf bi ȝiftis of God bifore ȝouun to hem mowen [mowe, MS. (first hand) apparently.] not kunne, make, do, and ordeyne hem silf, God wole do, make, and ordeyne bi him silf to hem, if thei be necessarie and vnlackeable to hem, as ben the soulis of oure chil|dren to vs and othere suche thingis. And thus miche is ynouȝ for answere to the questioun askid in thi iije. semyng skile and to the argument there maad in forme; forwhi the firste premysse of the argument is to be denyed; and whi he is to be denyed, it is open bi this processe in this answere now maad.
And ȝit, (if y schulde ferther seie,) y woot riȝt weel, that if thou ȝauest to thi man hors and sadil, armour and spere, and schuldist bidde him ride into a certeyn feelde, and take to him a prisoner worthi in raunsum of an hundrid pound; and if her with thou myȝtist and schuldist like verili ȝeue to him his boldenes, his strengthe, his inward and outward wittis, and his resoun and wil forto reule him in the taking of this prisoner, thou woldist seie that thou ȝauest to him this prisoner; for this that thou ȝauest to him alle the meenys bi which and with whiche he schulde take this prisoner, not withstonding that he him silf withoute thee takith this prisoner bi and with the meenys and helpis whiche bi caas thou hast ȝouun to him:—wherfore, sithen God ȝeueth to men inward and outward sensytyue wittis and resoun and wil and moving power to make speking and othere bodili movingis and alle othere meenys, wherbi and wherwith men mowen bi hem silf suf|ficientli knowe that suche religiouns ben profitable to hem, and make and ordeyne religiouns now had
