kutt awey. Forwhi the sclaundris of tho persoones ben sclaundris acceptid and takun into hem bi hem silf and her owne freelnes, and ben not ȝouun to hem bi tho religiouns.
Neuertheles, thouȝ this be trewe what is now bifore seid, that whanne sclaundre (that is to seie, synne) cometh into a persoon bi a gouernance aftir the ije. maner oonli, thilk gouernaunce hath no wijt or deser|uyng or riȝt forto be leid awey, but the freelnes of the persoon ouȝte bi riȝt be fouȝt aȝens and be leid awey, ȝit in this maner wolde be had this special consideracioun and therupon folewingli this now to be ȝouun tempering moderacioun. Whanne synne cometh into a persoon bi a gouernaunce and in the ije. maner oonli, and this person so ofte fallith into thilk synne, whanne he holdith thilk gouernaunce, that the synne is as it were vnscapeable and vnavoidable of him; and herwith it is so, that the same gouernaunce is not to him comaundid of God and bi his lawe, and therfore is not necessarie for his saluacioun, certis thanne it is to be aspied weel bothe bi resoun and bi sure assay and experience, whether it be esier and surer and lasse peyne and bateil for to fiȝte aȝens his freelnes and hise lustis and ouercome it with the holding of the seid gouernaunce, or ellis aȝenward it is esier, surer, and lasse peyne and lasse bateil forto forgo [for go, MS.] at al and lacke the seid gouernaunce, than for to fiȝte and ouercome the lustis of his freelnes. If it be sureli founde bi cleer sure resoun or bi sufficient assay that the persoon is disposid in the first of these ij. now seid disposiciouns, it is not good reule that he caste awey fro him the seid gouernaunce, namelich if thilk gouernaunce be myche profitable to him in othere goostli sidis and stondith to him in miche
