Out of which bigiling God for his merci graunte, that thei rise sumwhat the sooner bi enformacioun which thei mowen take bi rehercel now mad of heretik sectis; that thei rise out fro her indignacioun born anentis religiouns now had in the chirche, and fro al the bacbiting which thei maken aȝens the same religiouns.
iiij. CHAPITER.
THE ije. principal conclusioun biholding the vje. principal gouernaunce is this: Doom of clerili in kinde disposid resoun lettith not and weerneth not the seid vje. principal gouernaunce. That this conclusioun is trewe y proue thus: If eny doom of such resoun schulde lette and weerne the seid vje. principal gouer|naunce, it schulde be oon of these doomes which ben conteyned in the iiij. semyng skilis now next to be maad and fourmed; but so it is, that noon of tho doomes lettith and weerneth the seid vje. principal gouernaunce. Wherfore no doom of such seid resoun lettith and weerneth the seid vje. principal gouernaunce.
The firste of these iiij. now spokun semyng skilis is this: Ech religioun is vnleeful and not worthi be had and vsid, which lettith and afore barrith, ȝhe, and weerneth the comaundement of God in his lawe of kinde to be doon; but so it is, that ech of the bifore spoken religions now had and vsid in the chirche and conteyning vow of wilful expropriat pouerte and obedience to certein reulis and statutis lettith and afore barrith, ȝhe, and weerneth hise re|ligiose persoon for to do and fulfille sum comaunde|ment of God. Forwhi ech of tho religiouns lettith and forbarrith and weerneth hise persones for to do bodili almes deedis to the pore and nedi, and also forto worschipe his fadir and modir in the effect of
