and also these now rehercid mennys lawis and tradiciouns, whiche ben of the ve. now seid gouer|naunce, weren mad bi consent of the Apostlis ȝouun therto, or at the leest bi sum ground bi which the makers knewen sufficientli that forto so make and ordeyne it accordid with the witt and the wil of the Apostlis.
But ȝit ouer al what in this [this is interlineated by a later hand.] wise goith bifore, y sette therto this now to be fourmed argument into stable confirmacioun of al it which is now bifore argued bi Scripture into this present purpos: Holi Scripture, ie. Cor. xje. capitulum., makith open mensioun that Poul made an ordynaunce to the men of Corinthe, that thei schulde not take her hosil, (that is to seie, the holi eukarist,) at nyȝt tyme aftir her soper, (or in sum other special maner thanne vsid, not now sureli knowen,) forto therbi contirfete Cristis doing at his soper and forto remembre therbi his soper, not withstonding thei hadden vsid thilk maner bi long tyme afore. Ferthermore in the eende of the same xje. chapiter Poul warneth hem, that ouer this, which he so ordeyneth and stabilith to hem in the fourme of lawe now rehercid and bi him silf maad, he wole ordeyne mo gouernauncis to hem, and so make mo suche lawis to hem, in the next tyme whanne he schulde come to hem. And so herbi it is cleer bi Holi Scripture in the now alleggid place, ie. Cor. xje. capitulum., that it is leeful lawis be mad bi man and be sett for to be in vce with the comoun Cristen lawe ȝouun and mad immediatli bi God. Forwhi ellis Seint Poul hadde do amys, which made this now re|hercid lawe and settide it to be had in vce with the comoun lawe of God thanne had and bifore vsid. Also Poul made bi hise owne power this lawe, as
