The repressor of over much blaming of the clergy.

Aȝens this now rehercid blamyng and vndirnemyng y may procede thus: If these blamers in so blamyng meenen, that no lawe of mannys ordinaunce ouȝte be sett to and with the comoun Cristen lawe of God maad of lawe of kinde and of sacramentis, as manye suche blamers ben, aȝens her blamyng and chaleng|ing so mad proceden and goon forth in grettist strengthe and in openest euydence alle tho conclu|siouns of Scripture and of resoun, whiche bifore in this present iiije. partie ben mad upon bischophode and othere statis aboue preesthode and othere ordris binethe preesthode fro the bigynnyng of this present iiije. partie hidir to; and also alle tho conclusiouns of Scripture and of resoun, which aftir in the ve. parti of this book prouen that religiosite of mannys ordinaunce is leeful, and may weel be sett to the comoun lawe of God mad of lawe of kinde and of sacramentis. For whi ech such seid ordre or dignite and ech such seid religiosite mad bi man is a law and ordinaunce mad bi man and sett to and with the seid comoun lawe of God; and therfore how weel such bischophode or religiose mannys lawis mowen be mad and sett to and with the lawe of God, so weel bi al resoun othere politik mennys lawis mowen be mad and sett to and with the same lawe of God; sithen bothe bischophode and archibischophode, deken|hode and religiose mannys lawis, and othere politik mennys lawis ben noon othere than mennys ordi|nauncis and mennys tradiciouns reuling men forto do this or that, to which as bi Goddis pleyn lawe tho men weren not bifore bounde. And therfore if it be leeful and profitable statis or ordris in the chirche aboue preesthode and binethe preesthode and religiouns be maad bi men and be sett to Goddis comoun lawe, as it is proued bifore in this iiije. partie and aftir proued in the ve. party of this book; certis no man may thanne avoide, but that it is leeful ynouȝ and