Petir, it [it is interlineated by a later hand.] is to be seid that sithen bi the same text folewith that preesthode is to be had, as is open ynouȝ bi the letter in the processe there, and sithen the same text weerneth not bischophode and archibischophode and popehode to be had, as is now bifore schewid, and sithen it is now bifore proued that preesthode and bischophode, in that that thei ben preesthode and bischophode, ben ouertees to hem for which thei ben had and vsid, it muste folewe needis that the dew vndirstonding of this text, ie. Pet. ve. capitulum., is the vndirstonding which is ȝouun bifore in the iije. parti of this book, the iiije. chapiter, vpon the iije. principal processe, [See p. 300.] which vndirstonding is this: that thouȝ bischopis and archibischopis han ouerte vpon her nethereris, ȝit thei schulden vse her ouerte not at her owne plesaunce oonli or not at her owne glorie or her owne avauntage oonli or principali, but in to the profit and avail of her netherers, as fer forth as the lawe seruying to thilk ouerte wole; and in that thei be not holding lordschip in the clergie, that is to seie, not such lordschip as worldli princis and worldli vndir hem dukis and othere statis ben woned to holde and vse bi tyranry vpon her netherers. And sithen this muste needis be the meenyng of Peter there, it is seid ynouȝ here for dew vndirstonding ther of, that it gooth not aȝens the seid iiije. principal politik gouernaunce vsid in the clergie of the chirche.
To the ije. text, which is of Poul, ie. Cor. iije. capitulum., it is to be seid that his dew vndirstonding is this: that noman baptisid or cathezized, that is to seie, tauȝt the feith and the lawe of Crist, ouȝte holde him the holier for that he is baptisid or is so tauȝt and leerid of an holi man, than if he had be so
