but which aȝenstondith beggerie. And that is the sufficience now declarid.
Forthermore bi "beggerie" Salamon vndirstondith in the same text al lak [al-lak, MS.] of the now seid sufficience, or the lak of the now seid sufficient hauour. For|whi whanne euere eny man lackith his seid sufficient hauour, and is not in nyȝe power forto gete or haue it bi his owne wynnyng or bi eny other wey than bi asking it of othere, that it be ȝouun to him, sotheli than he is excusid forto begge; and his plite, in which he thanne is, which is not ellis than lak of sufficience into what he hath for than to do, mai and ouȝte be clepid to him beggerie.
The "ricches" of which he spekith in the same text is hauour of so miche ricches, that thouȝ it lassee and abbate, as myche as it is likeli it abate bi condicioun of the world, ȝit it schal not be so litil, but that it schal be to a man ouer and aboue the seid sufficience, [the seid sufficience is added in the margin by a later hand.] al the while that he hath to do with thilk ricches. And that he vndirstode thus bi thilk ricches, y proue thus: If he hadde vndirstonde eny ricches lasse than this now seid, sithen ech ricches lasse than this now seid wole make bi proces of tyme to his possessour state or plite of sufficience, it wolde folewe that Salamon in the seid text, whanne he preied that ricches schulde not be ȝouun to him, he preied ther yn that sufficience schulde not be ȝouun to him. Wherfore he meened bi ricchesse as it is now expowned.
And so folewith herof, that vndir the meenyng of Salamon in his now rehercid preier to God it is includid that he wolde this: If eny couent or comounte or eny oon persoon schulde be endewid into such sufficience
