and to othere men vndir comaundement. And thanne ferther, sithen no thing ellis out and bisidis Holi Scripture can be founde a sure iuge forto this iuge, but if it be mannys weel disposid natural resoun or ellis sum sure special reuelacioun mad fro God out and bisidis Holi Scripture of the Bible; it folewith needis, that we ouȝten not take this now seid ensaumpling of Crist as doon to vs vndir comaundement, but if cleer weel disposid natural resoun it deme to be ȝouun to us vndir comaundement. But so it is, that no cleer natural weel disposid resoun wole deeme that Crist ensaumplid the now seid greet pouerte vndir comaunde|ment to eny persoon. Wherfore no persoon (preest ne other) is boundun for to it take and fulfille.
That no cleer resoun wole deme the seid ensaum|pling to be haue doon vndir comaundement, y proue thus: No cleer resoun can deeme that Crist ensamplid thilk greet pouerte vndir comaundement, but if the same cleer resoun can deeme that thilk same greet pouerte is a comaundement, thouȝ Crist hadde it not ensaumplid. Forwhi bi this that Crist dide and vsid and ensaumplid thilk pouerte, resoun can take noon evidence that ther yn Crist comaundid it; sithen thanne bi lijk skile ech deede, which Crist dide and ensaumplid, he ensaumplid vndir comaundement, and he ther yn and therbi it comaundid; which is not trewe: for as miche as he him silf witnessith, Math. xixe. capitulum., that oonli vndir counseil he profrid chastite to alle men that myȝten it take; and also resoun deemeth sufficientli ynouȝ, that no thing may lette him that is God for to ensaumple vndir comaunde|ment or vndir counseil at his fre liberte what euer good dede him lustith to ensaumple. Wherfor this is needis trewe, that resoun can not and mai not deeme that thilk seid greet pouerte was ensaumplid by Crist vndir comaundement, but if resoun can deeme that thilk same pouerte was and is a comaundement of
