esy and liȝt it schal be therbi forto answere to alle othere doctrinal textis and processis of Holi Scripture in the Newe Testament, if eny of hem be sownyng aȝens the seid endewing.
vj. CHAPITER.
THAT no parti of Holi Scripture in the Newe Tes|tament being of the iije. there seid soort that is seid, being historial ensaumplal, lettith the seid endewing of preestis, is now to be proued thus: If eny ensaum|pling schulde lette the seid endewing, it schulde be the ensaumpling of Crist or of sum Apostle or of the multitude of Cristen men, of which it is rad, Acts ije. capitulum. in the eende, thus: Alle that bileeueden weren to gidere and hadden alle thingis comoun; thei seelden possessiouns [possessioun, MS. (first hand). The plural occurs in Wiclif's (later) version, from which this citation is made.] and catel, and departiden tho thingis to alle men, as it was nede to ech; and Acts iiije. capitulum. in the eende thus: How manye euere weren possessouris of feeldis either of housis, thei soolden and brouȝten the pricis of tho thingis that thei selden, and leiden bifore the feet of the Apostlis; and it was departid to ech, as it was nede to ech: or ellis it schulde be the ensaumpling of hem of which Poul spekith, Hebr. xje. capitulum., that thei wenten aboute in brocke skynnes and in skynnes of geet, nedi, angwischid, turmentid; to whiche the world was not worthi. But so it is, that noon of these ensaumplingis it lettith. Wherfore noon ensaumpling in Holi Scripture of the Newe Testament it lettith.
That the ensaumpling of Crist lettith it not, lo, y proue thus: Thouȝ alle Cristen men ben bounde forto
