keping and mynystring, euen as ofte tymes in Holi Scripture [See Deut. viii. 3.; Matth. iv. 4.] bi "breed" is vndirstonde al maner of foode. And if this be trewe, certis sithen the hauour and possessioun of immouable godis helpith and fortherith a bischop into the bettir bering and vsing his cure vpon hise vndirlingis, (as schal be schewid aftirward,) it folewith that vnder these ij. thingis schortli expressid of Poul here to Bischop Tymothie, "foode and couer|yng," is conteyned possessioun of vnmouable godis, in the maner and mesure and vce as thei helpen the bischop forto make the better cure vpon hise vndir|lingis. Also it is to be markid weel that Poul seith: A greet wynnyng is pitee with sufficience. Lo, how Poul allowith weel al that makith a sufficience into eny purpos or effect which muste be doon; and sithen into sum degre of good cure bering availith moche plente of vnmouable ricchessis had and receyued withoute labour of it wynnyng and geting, it folewith that it stondith weel with the proces of Poul in this present processe, that bischopis haue endewing of vnmouable possessiouns.
Ferthermore, whanne Poul seith thus: Thei that wolen be maad riche fallen into temptacioun, and into snare of the feend, et cætera; it is to be vnderstonde that not oon but dyuers it is forto seche and wille be mad riche bi [mad bi, MS. (first hand).] wynnynge of tho ricchessis thoruȝ craftis or marchaundisis or other meenys of bisynessis, and dyuers it is forto receyue ricchessis mouable or vn|mouable redy whanne thei ben profrid. Certis, thouȝ the firste maner may not be doon withoute the perels which Seint Poul spekith of here, the ije. maner may weel ynouȝ be doon withoute such perels. Ȝhe, perauenture more perel schal befalle [be falle, MS.] in ouer greet pouerte than in ouer grete ricchessis so freli profrid and receyued; but if it be in a fewe persoones in|disposid forto entirmete with ricchessis, whiche ouȝte forbere for the while the prelacie, into which suche
