The repressor of over much blaming of the clergy.

THE iiije. principal processe of the Newe Testament, bi which myȝte seeme endewing of prestis to be vnleeful, is writun ie. Thimoth. vje. capitulum., where Poul blamed sum men "whiche deemeden wynnyng to be pite," and there he seith to Thimothie bischop thus: A greet wynnyng is pitee with sufficience, for we brouȝten yn no thing into this world, and no dout that we mowe not bere awey eny thing; but we hauyng foodis and with what thingis we schulen be hilid, be we content or paied with these thingis. For thei that wolen be maad riche fallen in to temptacioun, and into snare of the deuel, and into manye vnprofitable desiris and noiose, which drenchen men into deeth and perdicioun. For the roote of alle yuelis is coueitise, et cætera. But thou, man of God, fle these thingis; but sue thou riȝtwisnesse, pitee, feith, charite, pacience, myldenes. This processe lettith not the seid gouernaunce of endewing. Forwhi, if this processe schulde so streitli be vndirstonde, that a bischop schulde not haue more than mete and drinke, hous and clooth, certis thanne it muste be seid that Poul wolde no bischop haue eny stoor of bokis, neither money forto bie or lete make therwith eny bokis, which is aȝens Poulis owne meenyng, ije. Thimothie, iiije. [iij e., MS.] capitulum. toward the eende. And also a bischop schulde not haue an hors forto on him ride, (if the bischop were oold or sike,) neither a staffe forto go by in his eelde for sijkenes. Wherfore bi "foode and couering" Poul vnderstondith al that is necessarie into good cure