nede forto ech dai make him redi to die bi martirdoom of tirantis, and therfore hadde nede more forto ȝeue awey good than forto gadere, reule, gouerne, or kepe; and also ech such man was to traueile into straunge cuntrees forto preche the feith; and also he muste nedis leeue hise godis, if he eny [eny is added in the margin by a later (?) hand.] hadde, into his ene|myes hondis. And so neither wisdom neither profit were to hem so circumstancid with tho daies, placis, and maners of the peple for to holde eny movable or vnmouable godis, but if it were sumwhat of money oonli. Wherfore folewith nedis, that bi strengthe of the firste seiyng of Crist may not be proued that the iije. principal bifore seid gouernaunce of this book is aȝens Holi Scripture of the Newe Testament.
That the ije. seiyng of Crist lettith not the seid iije. principal gouernaunce, y proue thus: The riche man, of which Crist spekith in thilk ije. seiyng, is he which not oonli hath ricchessis, but which therwithal tristith ouer myche in hise ricchessis, and therfore folewingli loueth ouer miche hise ricchessis; as the text of Mark xe. capitulum., writing the same storie, declarith openli in this that Crist seide thus: How hard it is for men that trusten in richessis to entre in to the kingdom of God! Wherfore this ije. seiyng of Crist touchith not suche riche men, whiche han ricchessis and not ouer myche trusten in hem, neither ouer myche louen hem. And so folewith, that if eny man be so disposid that he can forbere ouermyche trust and ouer myche loue to ricchessis, he mai weel ynouȝ holde prelacie and ricchessis to gidere for eny lett which this ije. seiyng of Crist makith ther aȝens.
Also Crist seide here in this present proces, that "at God" it is possible a riche man to entre into the kingdom of heuen; that is to seie, with grace
