in ricchessis to entre into the kingdom of God. So that therbi it may be take and vndirstonde, that therfore Crist seide and counseilid or bade to him for|to forsake and sille hise ricchessis, bi cause that he was, as it were, vnable forto haue to do with tho ricchessis; and that for his natural indisposicioun and ouer soor inclinacioun of loue anentis hem, and for his ouer greet trust which in his witt he bisettid upon hem. Wherof folewith not, that Crist schulde wilne and bidde in lijk maner to eny other man, (preest or no preest,) which is not so vndisposid anentis ricchessis as this ȝong man was; and therfore al this what Crist seide to the seid ȝong man groundith not, that nedisly ech preest owith to lacke and forsake alle immouable possessiouns; no more than folewith, thouȝ the riche man, of whom it is writun Luk xije. capitulum., was vndisposid and vnable to haue and reule and dispense ricchesis, that therfore Zache and Abraham and Iosep of Armathie and king Dauith were vnable and vnworthi and vndisposid [vnworthi disposid, MS. (first hand).] forto haue and reule and demene ricchessis.
Also this present processe sowneth and berith ful greet euydence, that Crist here clepid this ȝong man into apostilhode [apostil hode, MS. (no hyphen following apostil at the end of the line; but apostilhode and disciple|hode distinctly just below).] or into disciplehode; and her with open trouthe it is, that the state and condicioun of tho daies weren such, that it accordid not with resoun eny man forto holde to gidere apostilhode or discipil|hode and possessioun of immouable godis or holding houshold and reuling of meyne and of movable godis, as it is schewid in The book of counseilis; thouȝ now adaies it may weel ynowȝ accorde with resoun, as soone aftir here schal be schewid. Forwhi ech man thanne stonding in apostilhode or discipilhode hadde
