historial oonli as is this, that Gabriel was sent to Marie; and seide to hir thus; and that sche answerid thus; and that sche childide hir Sone in Bethleem; and that he aftirward dide this miracle, and thilk mi|racle: or it is doctrinal oonli, that is to seie, loor of moral conuersacioun how a man schal gouerne him in his lyuyng immediatli anentis God, anentis him silf, and anentis hise neiȝboris, as is this, Thou schalt loue God of al thin herte and thi neiȝbour as thi silf; and so of othere like: or it is historial ensam|pial of the now bifore seid moral conuersacion, as is this, that Crist or eny of hise Apostlis in his moral lyuyng anentis God or him silf or his neiȝbour lyued thus or thus.
Here upon y argue thus: If Holi Scripture of the Newe Testament schulde forbede the seid gouernaunce, he muste nedis so do bi sum party of the ije. or the iije. seid soort; for the firste seid soort longith not to bidde or forbede eny vertu or eny vice, as is open ynouȝ, for he is historial oonli withoute doctrine of moral conuersacioun. But so it is, that no Scripture of the ije. or of the iije. soort in the Newe Testament so forbedith. Wherfore folewith, that no parti of the Newe Testament so forbedith.
That no parti of the ije. seid soort so forbedith, y proue thus: If eny such party of the ije. seid soort schulde forbede the seid thridde gouernaunce, it schulde bi [Perhaps a clerical error for be.] this processe writun Math. xixe. capitulum., where it is seid thus: Lo, oon came and seid to Iesus, Good maister, what good schal [what schal, MS. (first hand).] y do, that y haue euerlasting lijf? Which seide to him, What askist thou me of good thing? Ther is oon good God. But if thou wolte entre to lijf, kepe the comaundementis. He seith to him, Whiche? Iesus seide, Thou schalt [schal, MS.; but schalt is the reading of Wiclif's (later) version, whence this is quoted.]
