schulde strecche to Cristen preestis; bi lijk skile this forbode mad to Iewen preestis, that thei schulden drinke no wijn, neither sidir, neither eny drinke, which myȝte make the drinker drunke, thoruȝ al the tyme whilis he schulde offre sacrificis in her cours, (which forbode is writun Leuiticus xe. capitulum.) schulde also binde Cristen preestis, that al the while thei were wekeli occupied in offring the sacrifice of the auter, thei schulden drinke no wijn, neither ale ne bere, neither sider, neither eny drinke which mai make drunke. But this thing wole not be so hard forto leie upon Cristen preestis, that thei ben bounde therto bi strengthe of a lijk forbode mad to Iewen preestis. Wherfore folewith, that neithir eny man mai make him so streit to Cristen preestis forto pretende, that bi strengthe of eny [iny, MS.] forbode in Iewis lawe Cristen preestis ouȝten not be endewid bi vnmouable pos|sessiouns. And thus miche fro the bigynnyng of this chapiter in this present iije. partie hidir to is ynouȝ for proof of the firste conclusioun for his firste partie, that Holi Scripture forbedith not neither weerneth in eny place of the Oold Testament the seid firste principal conclusioun.
iiij. CHAPITER.
Now that the same firste conclusioun is trewe for his ije. party, (which is this, that Holi Scripture of the Newe Testament forbedith not the seid gouer|naunce, which is that preestis and clerkis in the Newe Testament haue in her lordschip and possessioun immouable goodis,) y procede thus: Ech party of Holi Scripture of the Newe Testament is oon of these iij. soortis, [sorortis, MS. (partly written on an erasure).] or ellis therto longing; for it is pure
