afterward—whanne the secunde lotting was mad for the xlviij. citees to be ȝouun to the dekenes, and this ije. lott fill upon Ebron, as forto be oon of tho xlviij. citees, as it is open, Iosue xxje. capitulum.—this Ebron herwith myȝte not be in the lordschip of the dekenis, bi cause the same Ebron was ȝouun bifore into the lordschip of Calepf. And so open it is herbi, that the ije. bifore sett colour helpith not the bifore seid mad bad answere.
Ferthermore thouȝ the seid answere myȝte lette the ije. bifore going argument, as treuthe is that he may not lette; (for the worse plite, in which the seid proces, Numeri xxxve. capitulum., mai be take aȝens this iije. principal gouernaunce, is such that thilk proces is indifferent [in different, MS.] to bothe sidis, that is to seie, to the iije. principal gouernaunce and to his contrarie,) ȝit thilk answere mai not lette the iije. bifore going argument fro his proof. Forwhi as it is open, Le|uiticus the laste chapiter, tho housis and tho feeldis, [feeeldis, MS.] whiche weren ȝouun to the preestis and dekenis bi deuoute vowis of the comoun peple, fillen into lord|schip of the preestis and dekenis; thouȝ it be seid there sumwhilis, that thei weren ȝouun to God and weren halewid to God. Forwhi of a feeld so ȝouun bi vow in a certeyn caas it is seid there thus: Whanne the dai of iubile schal come, the feeld schal be halewid to the Lord, and the halewid possessioun perteyneth or longith to the riȝt of the preestis. Lo, how in the wordis of God these tweine stoden weel to gidere and weren trewe to gidere, that an hous or a feeld or a citee was ȝouun to God, and ȝit was also therwith ȝouun to preestis into her lordschip; riȝt euen as in the same laste chapiter of Leuitik it is seid, that mouable godis (as money) weren ȝouun to God and
