thou slepe in it," neither the scoler seith to his felow thus: "Y ȝeue to thee this book, that thou leerne in it;" for certis, if he so seide, the receyuer myȝte cleyme the book for his in lordschip, as bi vertu and strengthe and forme of tho wordis. And therfore, sithen God seid that the lay parti of Israel "schulde ȝeue to the dekenys citees forto in hem dwelle," and seith not thus, "that the lay parti schulde take or delyuere to the dekenis citees forto in hem dwelle," it folewith openli ynouȝ bi likenes of these now bifore rehercid ensaumplis, that it is to be vndir|stonde and deemed that God wolde the dekenis to be verri lordis of tho citees, whiche thei schulde receyue bi ȝifte of the lay parti mad ther upon to hem. And this is ynouȝ aȝens the answere and his ie. colour.
That the ije. colour bifore sett for to fortofie and strengthe the same badde answere [answere is inserted by a later (?) hand, which has erased and re-written the two lines preceding.] availith not, lo y mai schewe bi this ensaumple. If the king of Englond ȝeue to me a citee with manye villagis theraboute in cumpas ligging, and sone aftir this ȝift y ȝeue the same citee with hise suburbis to an other man Robert, reseruyng to my silf the seid villagis, what schal herof folewe? Schal it be seid that Robert is not lord of this citee, aftir y haue ȝouun this citee to him; and that, bi cause that bifore y was lord of the same citee bi ȝifte ther of maad to me bi the king? Alle men mowe wite that it is not so to be holde and seid. Wherfore bi lijk skile, thouȝ in the firste soorting and lotting of the al hool lond of Iewis the cite of Ebron fille bi lott to Caleph, (and therbi Caleph was very lord of it, as it is open therof, Iosue xve. capitulum.) ȝit her of folew|ith not neither colour is worth forto seie, that ther|fore
