expressid a circumstaunce of the same ȝifte; which circumstance is the eende for which the ȝifte is maad. And open to ech man it is, that the expressioun of a ȝifte is an expressioun of more riȝt than is the expressioun of a circumstaunce longing to the same ȝifte; thouȝ it be the cheef and principal circumstaunce, worthier than eny othir circumstaunce of the same deede of ȝifte, as is now this present circumstaunce of eende. Wherfore herbi open it is, that the seid answere mai not be holpe bi the firste colour; and that for this that sufficient answere assoiling is now ȝouun to the same firste colour.
Confirmacion to this answere, now maad aȝens the same firste colour and the former answere groundid ther upon, mai be bi these ensaumplis. If a man ȝeue to me a gowne that y were it, certis herof folewith that he ȝeueth to me thilk gowne; and thilk gown is myn in lordschip as verrili as, if he ȝeue to me a pijnt of wijn forto drinke it, thilk wijn is mad myn in verri lordschip; and as, if a man ȝeue to me a peny to spende at the wijn, certis he ȝeueth to me the peny, and the peny is myn in verri lordschip of it. Forwhi, if he wolde that y haue the vce of a thing with outen lordschip of the same thing, he wolde seie thus: "Y delyuere or y bitake to thee this gowne for to were it; y delyuere to [to is interlineated, perhaps by a later hand.] thee this hous forto dwelle in it; y delyuere to thee this feeld forto tile it:" euen as an oosteler seith to his gist; "Sir, y take this chaumbir to ȝou forto ligge in it; y take this bed to ȝou forto slepe in it;" and as oon scoler seith to an other scoler thus: "Y take this book to thee, that thou leerne in it." And the oosteler seith not to his gist; "Y ȝeue to thee this chambir, that thou reste in it; y ȝeue to thee this bed, that
