The repressor of over much blaming of the clergy.

Certis the seid answere may not be strengthid bi the ie. now rehercid colour or evidence. Forwhi whanne a persoon makith a ȝifte, and to gidere therwith the ȝeuer expressith his entent or eende into which and for which he makith his ȝifte, thilk expressioun of his intent and of the eende entendid to be had bi the ȝift lettith not the ȝift to be a ȝift, but suffrith it to be a ȝifte as ferforth as thouȝ he had mad the ȝift withoute the expressioun or the open pronouncing of the same en|tent or eende: as if a man wolde seie; "Y ȝeue to thee a [a is interlineated by a later (?) hand.] peny forto spende it at the wijn;" the ex|pressioun of his entent lettith not but that he ȝeueth the peny, and makith the receyuer of the peny to be lord of the peny. But so it is, that whanne God seide that the laife of Israel schulde ȝeue of her pos|sessiouns to the clergie of Israel citees to dwelle in hem; here in these wordis is expressid the ȝifte, and therwith is expressid the eende which the ȝeuer wolde be had bi the same ȝifte. Wherfore bi these wordis is not lett maad, that this same ȝifte into the now seid eende be a verri ȝifte; as it schulde haue be, thouȝ the eende of indwelling hadde not be expressid, but hadde oonli be entendid and hopid withoute expressioun. And so it is vntrewe, that [that seems to be superfluous and unmeaning; probably it should be cancelled.] whanne it is seid that in these wordis "forto dwelle in tho citees" is expressid al the riȝt whiche preestis and dekenis hadden into tho citees; for more riȝt than so is expressid in these wordis, Ȝeue to the dekenys citees. And the ful hool riȝt is expressid in these to gidere wordis, Ȝeue to the dekenis citees forto dwelle in hem; for in the firste parti of these wordis is expressid the substaunce of the ȝifte, and in the ije. parti of tho wordis is