That al this which is take in this ije. argument forto proue and conclude his conclusioun is trewe, lo what is writun Numeri xxxve. capitulum. in the bigyn|ning thus: And the Lord spak these thingis to Moyses in the feeldi placis of Moab aboue Iordan aȝens Ierico: Comaunde thou to the sones of Israel that thei ȝeue to dekenes of her possessiouns citees to dwelle and the subarbis of tho bi cumpas, that thei dwelle in the citees; and the subarbis be to beestis and werk beestis: whiche subarbis schulen be strecchid forth fro the wallis of citees without forth bi cumpas in the space of a thousind pacis; aȝens the eest schulen be ij. thousind cubitis, and aȝens the south in lijk maner schulen be ij. thousind cu|bitis, and at the see that biholdith to the west schal be the same mesure, and the north schal be eendid by euen terme. And the citees schulen be in the myddis, and the subarbis withoute forth. Thus myche there. Ferthermore, that this comaundement of God was executid, performed, and fulfillid, it is openli expressid, Iosue xxje. capitulum., where mensioun is maad that to the dekenis were ȝouun xlviij. citees with her subarbis in the maner now bifore comaundid bi God, and the names of tho citees ben there in the same chapiter rehercid. Wherfore what is seid and take into making and formyng of this present ije. argument is trewe.
The iije. argument is this: [this is added in the margin by a later (?) hand.] Ouer and biȝonde alle the xlviij. citees with her seid suburbis, which God ordeyned to be ȝouun to the clergie of the oold lawe, God licencid to ech persoon of the lay party forto ȝeue bi vow to the preestis and dekenis of the seid clergi his feeld and his hous, whether he hadde hem bi heritage or bi purchase; and if he for deuocioun wolde not bigge aȝen hem so ȝouun to the clerkis,
