The iiije. processe is writun Iosue xiije. capitulum. in the eende, where it is seid thus: Forsothe Iosue [Pecock should have written Moyses. Wiclif's version has he ȝaf not, &c.; where however there is a various reading Moises, which is expressed in the Hebrew and in the authorized version.] ȝaf not possessioun to the lynage of Leuy, for the Lord God him silf of Israel is the possessioun of Leuy, as the Lord spak to him.
The ve. processe is writun Ezek. xliiije. capitulum., where God in discryuyng the lijf which preestis of the oold lawe schulde lede, seide thus: Forsothe noon heritage schal be to hem: y am the heritage of hem. And ȝe schulen not ȝeue to hem possessioun in Israel; for y am the possessioun of hem.
The vje. processe is writun Ecclesiastici xlve. capitulum., where of Aaron and of hise sones Scripture seith there thus: Thei schulen ete the sacrificis of the Lord, which he ȝaf to him and to his seed; but in the lond of his folk he schal not haue heritage, and no part is to him among the folk; forwhi God is the part and heritage of him.
But so it is, that these now rehercid textis and processis meenen not ferther than that the preestis and dekenes of the Oold Testament schulden not haue part and lott in the firste parting of the lond of Iewry to the children and kinredis comyng out of Iacob, as it is open ynouȝ to ech man diligentli reding the placis out of whiche the now alleggid textis ben drawe. And also ellis God schulde haue be contrarie to him silf in hise owne ordinauncis, as schal be open aftir in this present chapiter, (bi the iije. argument,) and bi [bi is interlineated by a later (?) hand.] the iiije. chapiter. Wherfore no strengthe of the seid textis gooth not so fer as forto forbede to preestis and dekenys of tho daies forto haue lordschip of immouable godis bi othere weies,
