to the cros, so in lijk wijse it mai be an|swerid bi the same vije. and viije. reulis into the iustifiyng of alle othere preiers there maad (as in voice thouȝ not in the vnderstonding) to the cros, whiche ben rehercid bi fore in the xiije. argument. And for that this is open ynouȝ, therfore more speche therof y ouer passe. In other wise into iustifiyng of the seid preiers mad to the cros, I haue answerid in The book of worschiping, the ije. parti, the iiije. chapiter. Chese the seers which of tho answers to hem lijkith; for these answers here mad and the answer ther mad ben vndoutabli and at fulle [the fulle, MS. (first corrector). The whole of this paragraph is re-written on an erasure.] euydently trewe.
xx. CHAPITER.
FOR answere to the xiiije. and xve. argumentis to gidere vndir oon, y sende bifore these iij. reulis or supposicions.
Oon is: That a man schal haue more feruentli hise affecciouns and loues anentis his loued freend, whanne and whilis thilk freend is at sumwhile present per|sonali with him and bisidis him, than he schal haue, if the freend be absent alwey and not personali pre|sent with him. This reule is openli trewe bi expe|rience. Forwhi, (not withstonding a man talke and speke of his freend at the mete table or in sum other place, and haue as good affeccioun as he can haue upon the same freend in such absence,) ȝit if in the meene while the freend come into him personali and sitte doun with him, he schal haue miche gretter af|feccioun vpon the seid freend than he hadde in the freendis absence. Wherfore this firste reule is trewe.
