the othere preieris mad to the cros, and rehercid bi|fore in the xiije. argument in the [xe.] [A space left in the MS. for the number.] chapiter of this present ije. partie.
xix. CHAPITER.
NEUERTHELES, thouȝ bi these vj. reulis these preiers, whiche mowen be seid as mad to the cros, mowen be saued fro inconuenience [in conuenience, MS., and so just below, where in (at the end of the line) has no hyphen.] and vnaccordaunce, (and that for the dew vnderstonding which mai be ȝouun to hem bi these vj. reulis,) ȝit also sureli and vndoutabili tho preiers mowen be excusid fro inconuenience, and mowen be mad ful alloweable, fair, and honeste bi the vije. and viije. reulis or supposiciouns whiche now schulen be put forth.
The vije. reule or supposicioun myche lijk to the ije. reule is this: Whanne a man doith or suffrith a deede bi eny thing which is a meene prouoking or stiring notabili the doer or suffrer for to it do or suffre, or which is in eny other wise a notable meene therto, it is woned be seid that thilk meene dooth the deede; in this vnderstonding, that thilk meene helpith and fortherith in meenyng that the deede be don of his veri doer: as, if Iohun be a prouoking meene that the King ȝeue [ȝeueth, MS. (first hand).] to me xxti. pound of ȝeerli fee, whilis Iohun preieth the King that he so do, it mai be seid and is woned be seid that Iohun dooth and ȝeueth to me thilk fee, and his preier doith and ȝeueth to me the same fee; in this vndirstonding, that Iohun meeneth or helpith, and fortherith in meenyng that the ȝeuyng be doon, and his preier doith in meenyng
