hise parties weren the best thingis in al the hool vnyuersite of thingis and of beingis. And sithen ech of these men feelid weel in himsilf, that he hadde nede for to haue help and reuling more than an other man myȝte do to him, and that in manye caasis; and bettir help myȝte he not loke aftir than summe of tho thingis whiche he trowid to be beste thingis, as weren in his conceit and semyng the bodili heuen and hise seid bodili parties; therfore ech such man was stirid and moved forto chese to him summe of these planetis or sterris forto be to him his souereyn helper and lord of hise nedis, and therbi ech such man made to him sum planet or sterre forto be to him his God. And manye of these men accordiden to gidere in chesing to hem oon and the same thing for her God, and manye othere accordiden to gidere in chesing to hem an other thing for her God. And thus it was with men of the seid soort lyuyng in resoun oonli withoute feith, and which myȝten not in doom of her resoun rise hiȝer or fynde ferther, than that alle substauncis in the hool vnyuersite of thingis ben bodies oonli.
Summe othere and manye weren quycker in natural witt and waxiden better [better added in the margin in a later(?) hand.] philsophiris, and in her re|sonyng thei founden that in the hool vniuersite of thingis ben vnbodili substauncis, (that is to seie, spi|ritis,) bisidis the bodili substauncis in the same hool vniuersite of thingis; and thei couthen not fynde bi her resoun, but that tho spiritis weren vnmade and vndeedli withoute bigynnyng or eending in tyme; and that these spiritis weren gretter reulers of chauncis and deedis doon here bynethe than the bodili sub|stauncis, being parties of the bodili heuen, weren [were, MS. (first hand).]
