The vije. [seuenthe, MS.; but written on an erasure: the first hand almost always uses Roman numbers.] argument is this: It is neither wisdom neither tender loue bering to the seruice of God a man forto leue vndoon many better seruicis of God, for this that he wole do oon myche lasse good seruice of God; but so it is, that thouȝ the seid vsing of ymagis and the seid pilgrimaging weren seruicis to God, ȝit in the whilis and with the costis in and with which thei ben doon manye othere myche better seruicis of God myȝten be doon, as visit|ing of poor men, and teching of vnwise men, and bisie studie in deuoute bookis and in othere bookis of goostli leernyng. Wherfore folewith that a bad chaunge is forto bisette so mich labour and coste aboute ymagis and pilgrimagis.
The viije. argument is this: It is sure and sikir and greet discrecioun Cristen men forto holde hem to tho gouernauncis which Holy Scripture of the Newe Testament techith hem, and forto caste aside alle othere gouernauncis or reulis whiche ben not tauȝt in the Newe Testament; ȝhe, thou tho gouernauncis and reulis be [ben, MS. (first hand).] weel ynouȝ and sufficientli ynowȝ groundid in doom of weel disposid resoun. Forwhi Seint Poul seith, Coloc. ije. capitulum., thus: Se ȝe that no man disceyue ȝou bi philsophie and vein fallace aftir the tradi|cioun of men, aftir the elementis of the world, and not aftir Crist; for in him dwellith bodilich al the fulnes of the Godhede. But so it is, that Holi Scripture in the Newe Testament techith not the seid [seid is interlineated by a later hand.] vsing of ymagis neither the seid pilgrimaging; but thei ben had withoute forth bi resonyng and arguyng in moral philsophie: and of al such craft and sutiling ouȝten alle Cristen men be waar, that thei therbi be not bigilid. Wherefore Cristen men, (for tendirnes
